قالت طلبتك دخيلك بس تهديني
- الشعر الشعبي والنبطي والفصيح
- 1/2/2014
- 1651
- الشاعر خسن عبدالله المالكي
قالت طلبتك دخيلك بس تهديني
آخر قصيد وكلام بدفتر أشعارك
عودتني كل ما اطلب شي تعطيني
ماهي كثيره بحقي تكشف أسرارك
قلت العفو بالشعر ماعاد يمديني
عجزت بالشعر أوفي ربع مقدارك
حتى القلم يرتعش في قبضة أيديني
حبره نشف .. وإنتي تزيدين باصرارك
خلاص ننسى القصيد اللي معنيني
نسافر بعيد ... لايامك ولاخبارك
أبغي كلامك يشبعني ويرويني
ياعذبة الصوت هّي موجة أبحارك
في قلبك الممتلي بالحب خليني
بعيونك السود ... زيدي حدة أنظارك
في قمة جنونك تعالي ورديني
طفل ... بالأحلام شيّد في الهوى دارك
في امسياتك وفي ليلك تمسيني
وأصحى على أحلى صباح بنوره اختارك
لليوم أشوفك في عيوني تمريني
وأقرا بصفحة هواك حروف تذكارك
وان غبتي احتار .. وش جا بينك وبيني
والقى القمر ماسواه اللي غدا جارك
عرفتي انك عن الدنيا تكفيني
واني لو اختار .. الاقي جنتي نارك
فهمتي ان الشعر ماعاد يعنيني
واني كتبته عشان آريح أفكارك
تدللي وآمري وآقول من عيني
أسراري اللي طلبتيها هي اسرارك
وماهي جديده على شعري يبكيني
مادام عاجز يوفي ربع مقدارك
عدد المقيّمين 0 وإجمالي التقييمات 0
أضف تعليقك على الموضوع