تكفى ترى تكفى تهز الرجاجيل

 

اليوم بنقل لكم قصيدة تكفى ترى تكفى تهز الرجاجيل... ولو ماصروف الوقت ماقلت تكفى .... وخصوصا أنني وجدت القصيدة قبل فترة في الكثير من المواقع... ولكنها ليست كاملة بل تحمل اقل من (10) ابيات ولم تُنسب لقائلها ولكنني اليوم سوف أكتبها لكم كاملة ومنسوبة لقائلها قائلها هو

الشاعر محمد الدحيمي الشهري والملقب بــ ( أخو تكفى )..

 

علم العفا وعفاك .. يا وافي الكيـل
بساطه أبشّرك .. في خيـر وعفـا

نكفي بعضنا ,, وانتكافا على الشيل
واللي تعب من الحطّ والشيل يكفـا

من ذاق حرّ القايلـه يعشـق الليـل
ومن شبّ ضّوه ليلة البرد .. يدفـا

لاعاد ليلٍ ٍ نمت به في حرى سهيل
وخايلت نوضٍٍ يخطف العين خطفـا

امسيت من جيل ٍ ولاهوب ذا جيـل
واصبحت ... والاّ ديرتي شبه منفا

كنّا على فـال الشحـم والمعاميـل
ونفوسنا انقى من نقى العدّ .. واصفا

وانا ولو راحت بقولـة : تساهيـل
صلف وصروف الوقت تحتاج صلفا

ياترج جدّاني .. زحول الرجاجيـل
يحرم فلا لي عنك ياتـرج .. مقفـا

إمّا لطمنا العيل .. والاّ الطم العيـل
مادام شبّ النار منـدوب الأطفـاء

خل ابرهه الأشرم على ذمّة الفيـل
وانظر لشيٍ .... مايوصفّه وصفـا

ياذيـل والله ماتجـي راس ياذيـل
علمٍ ماهو يغبـى ولاهـوب يخفـا

واللـي حمـا بيتـه بطيـرٍ ابابيـل
ماجيتـك ادوّر لمـن راح واقـفـا

ولا جيتك اطلب منك بن ٍ ولا هيـل
جيتك وجرح الظلم .. غاديه يشفـا

جيتك بكلمة .. كنّها صعقـة الويـل
إن قلت تكفـا ... لا تهـاون بتكفـا

تكفا .. تراها كلمـةٍ تقطـم الحيـل
لا بالله الا تنسـف الحيـل نسـفـا

تكفا .. ماهـي لمعقبيـن الفناجيـل
تكفا لصلف وعـادة القـرم صلفـا

تكفا .. ترى تكفا لها هـدرة السيـل
في صدر حرًّ .. ينتف الطيب نتفـا

تكفا .. ترى تكفا لها تسرج الخيـل
إن كان لك باالخيل سرج ٍ و عسفـا

تكفـا .. تبيّـن كـلّ لاشٍ وحلحيـل
تسمع لهـا بالصـدر هبـدٍ ورجفـا

تكفـا .. وتكفـا ماتسـاق لمهابيـل
تكفا .. تخلي القـرم لاشٍ وهطفـا

تكفا .. تجنّبني هل القـال والقيـل
مانيب من ينكف علـى كـل ملفـا

تكفا .. تراني من قـروم ٍ مشاكيـل
حمّاية الساقـه .. بسيـفٍ وشلفـا

تكفى تـــــرا تكفى تهز الرجاجيل
ولولا صروف الوقت ما قلت تكفى

تكفى يــا مزيد ما يبا العلم تفصيل
المشكلـه كبرت على عماش تكفى

مــا قلت تكفى غير من فترة الحيل
وانتــه ولد من يفعل الطيـب تكفى

انخاك من كثــــر العنـــــا والبهاذيل
الفقر حطمني .. وانــا ازريت تكفى

غديت مثل اللي بــرك ضامه الشيل
تضحك بي ضعوف الرجاجيل تكفى

يـــومٍ لك وقفه .. وجاه .. ومداخيل
مــــا غنتني عن مثل شرواك تكفى

افزع تــــــــرا وقتي غدى كنه الليل
والعلم مــــــــــا يخفاك يالقرم تكفى

مـــــا عاد بي شده ولا عاد بي حيل
ضدتنـــي الايـــام ... والـقــلّ تكفى

اروح وارجع مــا حصلي محاصيل
والرجل بادت .. يا فتى الجود تكفى

واليوم عندك يـــــــا رفيق المشاكيل
العذر مـــــــــــا ينفع وانا قول تكفى

حيثك من اهل الطيب واهل المفاعيل
يـــــــا زبن من جاله ومن قال تكفى

الجيب فـاضـــــي .. واليالـي مقابيل
عجزت اعيش مع الرجاجيـــل تكفى

والراتب المحدود .. يــــروح تحويل
من الاداره .. لاهـــــــل الديـن تكفى

حتى عيالــي مـــــا قدرت الهم الكيل
والازمــــه لا جـــات .. صديـت تكفى

ارجـــى الفرج والله يجيـب التساهيل
واعيش فـــي راحه مع الناس تكفى

والله كريــــــــم .. يبـــدل الحال تبديل
ومــا قلّ دلّ .. وصامـل الهرج تكفى