حنا سعوديين سنه وشيعه متكاتفين ولا تفرقنا الاوباش

 

حنا سعوديين سنه وشيعه متكاتفين ولا تفرقنا الاوباش

كتب الاسبوع الماضي الشاعر شجعان العتيبي من الرياض تضامنا مع اهالي بلدة القديح بالقطيف اثر الحادثة الاجرامية التي حدثت في احد المساجد وعزاؤنا لذويهم ودعواتنا بأن يلهمهم الله الصبر والسلوان انه سميع مجيب..

ويقول البيت للشاعر
عبدالعزيز بن مفراص المعاوي - بيشة
*
حنا سعوديين سنه وشيعه

متكاتفين ولا تفرقنا الاوباش

وقد كان صدى البيت من الشعراء

ولا بنرضى بالعلوم الشنيعة

من شلة(ن) ، شل الله ايدين الادعاش

نحمي وطنا بالسيوف البريعة

ولا يزعزعنا ردي(ن) و غشاش

من الشمال إلى حدود الوديعة

ومن البحر ل البحر،عاش الوطن عاش

أكبر فخر لي الشهادة رفيعة

دون الوطن و الدين هالروح تفداش
***
محمد عبد العزيز الخنيفر - أشيقر
*
حنا نحب الخير هذي طبيعة

واللي مشى هالسلم فالعين له فراش

واللي مشى للشر حنا نبيعه

ومن ثار فتنة بدارنا اليوم ما عاش

حافظ على دينك سلم الشريعة

وخل الدروب اللي بها خاش خرباش

هذي نصايح قلتها لك سريعه

ما قلتها تقسيط لكن ترى كاش
***
عبيد عبدالله الرمال - المدينة المنورة
*
يادارنا حنا السيوف اللميعه

دونك نبيع الروح والنذل لا عاش

ماهمنا اهل الفتن والقطيعه

لو حاولوا لو حاولو شلة اوباش

نبقى مثل هاك الحصون المنيعه

ولا يزحزحنا عن الحق غشاش

وان لزمت الارواح حنا نبيعه

لاجل الوطن شوباش شوباش شوباش
***
ناصر بن جمعان آل عوض - وادي الدواسر
*
في دولةٍ فيها المبادي الرفيعه

يقصد ثراها من يبي الرزق يعتاش

غصبٍ على الفجار تبقى منيعه

في حكم من هو بالمعادين بطاش

سلمان يأمرنا وماحسن صنيعه

حنا سهامه في صدر كل غشاش

شرق الوطن صابه حوادث شنيعه

من طغمةٍ باعت هل الحقِّ ببلاش

مشاهدٍ هزَّت جناب الوسيعه

دم المصلي سايحٍ فوق الِفْرَاش

ياللي تبي تحدث صراع ووقيعه

أبشر ترى مكرك تمخَّض على لاش

يا ربِّ تكفينا النفوس الوضيعه

أذناب طهرانٍ وداعش وعفاش
***
ريان محمد الخنيفر - الرياض
*
من يحترم نفسه ويحسن صنيعه

هذاك وضعه عندنا بين الارماش

ولاعاش من حط الضغاين طبيعه

يفرق مذاهب عندنا نقول لا عاش

على العدو نصبح حصونٍ منيعة

نشري الترابط سعرها كاملٍ كاش

في ظل دولة دايماً في الطليعة

من جاء يشتت جمعها هج وانحاش

سعود عبدالعزيز الهزاع - نعام

ما احلى القلوب الطاهرة والمطيعه

ومن خاننا يالربع بعناه ببلاش

هذا الوطن غالي وصعب نبيعه

حنا نحب الخير ولا نقبل اوباش

بقلوبنا ثابت وما احلى ربيعه

ونكره ترى الاشرار ودروب الاحراش

وحنا نحب اهل النفوس الرفيعة

ومن خان داره عندنا اليوم ما عاش
***
حمد عبدالله الوايلي -حوطة سدير
*
حنا سعودين سنه وشيعه

لا عاش من يصبر على الضيم لا عاش

دون الوطن حنا سدودن منيعه

يموت من يموت ويعيش من عاش

هذا وطنا بالثمن ما نبيعه

لا مانبيعه قلت بالدين والكاش

يامر ابوفهد وحنا نطيعه

حنا هل الشوباش لاقيل شوباش

سعدصنهات السهلي - الدرعيه

حنا سعوديين دين وشريعه

مانقبل الخاين ولا كل غشاش

لو حاولوا يولعون الوليعه

وافكارهم افكار مجرم وحشاش

اغواهم الشيطان جابوا بديعه

سفاكة للدم هيام وعطاش

لابد ماتظلم عليهم وسيعه

ويزول منهو على راسه قشاش

واللي باسم الدين حطه ذريعه

مهوب يمه بايع الدين بالكاش

***

علي الزولاني الفيفي - بيشه

*

على عدانا سيف يبرق لميعه

ماهزنا مرجف وخاين وخفاش

الشعب واعي والبساله طبيعه

في شبلنا والشيب يازمرة اللش

مهما ومهما ياكلاب الخديعه

حنا وراكم كل مجرم وغشاش

سني وشيعي في مهاد الشريعه

ضد المعادي نلطمه كلنا كاش