ماعندك الا السيكل اللي تملكه

الشاعر محمد السكران من شعراء المملكه والخليج المعروفين وله العديد من المحاورات والقصائد والشيلات شاعر نظم وشاعر قلطه

الشاعر محمد السكران

الوقت قاسي وانت ياعبدالسلام
هندي وعمرك راح وسط المملكة

موظف ومسكين وتحب النظام
وماعندك الا السيكل اللي تملكه

واهم حاجه فيك ماتاكل حرام
اللي تحس ان فيه شبهه ؟؟ تتركه

يتيم وتصلي الفجر خلف الامام
وابوك مات فـ بورما في معركه

وان قلت كيف الحال؟ جاوبني : تمام
مرتاح في ذا المسلك اللي يسلكه

اقصى طموحه يوم فالبيت الحرام
يقضي بها فرضه ويقضي منسكه

وحنا نحب النوم ونحب الكلام
النفط خلانا قليلين ابْركه

ماعندنا غير السوالف فالدوام
فلان مابه خير ، وفلان اتنكه

ماندري ان عيون ربي ما تنام
سبحانه اللي كل شي(ن) يدركه

قلوبنا اكبر منْك يا بيض النعام
واخبارنا وافكارنا مستهلكه

نهتم فـالتجّـار كل الاهتمام
اللي تفرنك بالدراهم فرنكه

مانحترم من يستحق الاحترام
كلن يخاف من الفقر لا يفركه

لو الفقر يذبح ؟ ذبح عبدالسلام
ماعنده الا السيكل اللي يملكه

Share

عدد المقيّمين 0 وإجمالي التقييمات 0