ابونية غلب ابونيتين
- القصص والروايات
- 17/4/2017
- 2066
- منقول بالتصرف
ابونية غلب ابونيتين
يقولون كان فيه رجال نيته وحده (يعني بمصطلحنا على نياته) , وهي تراها مدحه لكن الناس أخلفوووو معناها مثل ما أخلفووو معنى الكثير من الكلام الطيب ومعه خويه جني خبيث (بنيتين) , وجني عفريت وهذي ترى مذمه ولكن بعض الناس خلوها مدحه لهذا وامثاله .
المهم مالكم بطوالها ابو نيتين هذا قال لأبونيه البير قدامنا والدلو طايح أنا بدليك داخل البير تملاء ماعوني .. وبعدين أنا أملاء ماعونك وبعدها اطلعك من البير قال أبونيه أبشرر ونزل أبونيه ويوم إمتلاء ماعون أبو نيتين ترك خويه أبونية داخل البير وروح عنه .
أثناء وجود .. أبو نيه بالبير .. جاء اثنين من الجن الى قاع البير وقاموا يسولفون مثل سوالفنا سالفة مجلس مثل مايقال ..قال واحد من الجن للثاني : تصدق أن البيت الفلاني يقولون فيه (غلة) عباره عن جره مليانه ذهب وكانت هذه السالفة من ضمن سوالفهم . .. طبعا أبو نيه سمع كلامهم وعرف المكان زين زين .
المهم إنه مر الوقت وجاء ناس لتلك البير ولقوا (أبو نيه) في البير وساعدوه وطلعوه من البير ويوم إنه طلع من البير على طول راح للبيت اللي ذكروه الجن في السالفة وحسب الوصف الي سمعه بالفعل لقى (الغلة) جره مليانة ذهب .. واستخرجها من مكانها وسار تاجر كبير وأغتنى وفتح الله له باب رزق .. وسار مشهور عند الناس بافعال الخير .
وبعد مرور حقبة زمنية شانت علوم أبو نيتين وطاح وسار مفتقر وفي يوم من الايام ساقته الاقدار حتى وقف امام باب ( أبو نيه) وشاف انه في حالة طيبة وغني وعنده راس مال كبير ومن الاعيان ويوم شافه ابونيتين عرفه زين المعرفة وقال أنت فلان ماغيرها اللي أنا تركته بالبير في ذاك الزمان قال: نعم الحمد لله قال ووش وصلك للمنزله هذي .. قال صدق نيتي قال أبيك تعلمني بالقصة كيف اصبحت غني... قال تذكر يوم نزلتني بالبير وتركتني وشردت عني قال نعم قال جاء عندي في قاع البير اثنين من الجن وكانوا يسولفون فيما بينهم وماكانوا يدرون عني وقالو كذا وكذا ...وقال له القصه كامله .
قال يعني كذا السالفه قال نعم .. ماكذب خبر على طول طلع من عند ابونية وراح يركض للبير ونزل فيها على أن يسمع مثل ماسمع خويه أبونيه ويوم سار في قاع البير جاء الجن الاثنين وقال واحد للثاني ترى الجره اللي بالمكان الفلاني ما عاد هي موجوده , أنت علمت أحد عن مكانها قال الجني الثاني لا ما علمت أحد قال وأنا ما علمت طبعا أبونيتين يسمع السالفة .. قال واحد من الجن والله أنه واحد في هذي البير يسمعنا وراح أخذها . لكن تدري خلنا نهدم البير هذي على اللي فيها .. ونضمن سرية سوالفنا طبعا قاموا وهدموها وأبونيتين فيها وسار المثل وقالو الناس (ابونية غلب ابونيتين) .
عدد المقيّمين 0 وإجمالي التقييمات 0
أضف تعليقك على الموضوع